ដោយ : បន្ទាយ

កំពង់ធំ៖ ករណីគ្រោះថ្នាក់ចរាចរណ៍បានបណ្តាលឲ្យសិស្សសាលា ២ នាក់ស្លា.ប់ភ្លាមៗនៅកន្លែងកើតហេតុ បន្ទាប់ពីម៉ូតូម៉ាកហុងដាឌ្រីម ពណ៌ខ្មៅ ពាក់ផ្លាកលេខកំពត1D-5783 ដែលមានសិស្ស២នាក់ជិះប៉ះទង្គិចជាមួយរថយន្តម៉ាក ហ្វដ ពណ៌ស ផ្លាកលេខ ភ្នំពេញ2AC-0279 ដែលហេតុការណ៍នេះកើតឡើងនៅវេលាម៉ោង ១៥និង៣០នាទី ថ្ងៃទី ១១ ខែវិច្ឆិកា ឆ្នាំ ២០២៤ ត្រង់ចំណុចផ្លូវប្រសព្វភូមិរកាជួរ ស្ថិតនៅឃុំក្លែង ស្រុកសណ្តាន់ ខេត្តកំពង់ធំ។

ប្រភពពីសមត្ថកិច្ចបានឲ្យដឹងថា អ្នកបើកបររថយន្តមានឈ្មោះ ស៊ឹម លាម ភេទប្រុស អាយុ ៥៤ ឆ្នាំ មុខរបរអាជីវករ ទីលំនៅភូមិអូរតាសៀវ ឃុំគោល ស្រុកប្រាសាទសំបូរ។ បន្ទាប់ពីកើតហេតុបានចុះរត់គេចខ្លួនបាត់។

ប្រភពខាងលើបានបន្តថា យុវសិស្សទាំង ២ ដែលជាជនរងគ្រោះបានស្លាប់ភ្លាមៗនៅកន្លែងកើតហេតុ គឺ ១. ឈ្មោះអ៊ឹម ពិសី ភេទស្រី អាយុ ១៦ ឆ្នាំ មុខរបរសិស្ស។ ២.ឈ្មោះម៉ប ម៉ាណិត ភេទស្រី អាយុ ១៦ ឆ្នាំ មុខរបរសិស្ស។ជនរងគ្រោះមានលំនៅភូមិទឹកវិល ឃុំក្លែង ស្រុកសណ្តាន់ ខេត្តកំពង់ធំ។

ក្រោយកើតហេតុ ក្រុមគ្រួសារបានមកទទួលយកសាកសពទៅធ្វើបុណ្យ។ រីឯរថយន្តនិងម៉ូតូត្រូវបានកម្លាំងអធិការដ្ឋាននគរបាលស្រុកសណ្តាន់យកទៅរក្សាទុកដើម្បីរង់ចាំដោះស្រាយបន្ត៕